إيهاب منصور: منظومة المعاشات «غلطة سيستم».. ومواطنون فوجئوا بتسجيلهم ضمن «الموتى»| خاص

قال النائب إيهاب منصور، إن ما يحدث في منظومة المعاشات يمثل أزمة حقيقية في النظام الإلكتروني، مشيرا إلى أن أي سيستم جديد كان يجب اختباره بشكل مسبق وعلى نطاق محدود، قبل تطبيقه على ملايين المواطنين.

وأضاف  منصور، خلال تصريحات لـ"البرلمان"، أن المنظومة كان من المفترض أن تخضع للتجربة والاختبار قبل إطلاقها، قائلا: «المفروض السيستم ده كان أولا اتجرب، وثانيا اتعمل له تيست على حاجات صغيرة قبل ما نطبقه على الملايين ونلاقي مئات الألوف بيخبطوا راسهم في الحيط».

وأشار إلى تضارب المواعيد التي جرى الإعلان عنها بشأن حل مشكلات منظومة المعاشات، موضحا أنه جرى في البداية الحديث عن شهر مايو، ثم يونيو، وبعد ذلك يوليو وأغسطس.

وتابع: «نقعد نوعدهم طب شهر 5، لا ده شهر 5، 5 يونيو، ويطلع رئيس الوزراء قبليها بيومين يقول يا جماعة لا ده إحنا شكلنا في أغسطس أو 10 أيام أسبوعين، فأنا مانيش فاهم هو في يونيو ولا في يوليو ولا في أغسطس».

وأوضح منصور أنه خلال اجتماع لجنة القوى العاملة في 17 يونيو، جرى إبلاغ اللجنة بأن الموعد النهائي سيكون 15 يوليو، ثم تم تأجيله إلى الأول من أغسطس لضمان الانتهاء من الإجراءات، إلا أن المشكلات استمرت.

وأكد أن الأزمة لا تتعلق بالمعاشات فقط، وإنما تمتد إلى ملفات أخرى، قائلا: «ده مش معاشات وبس، ده معاشات وعجز وشركات، حضرتك بتحاول تدفع الفلوس، وأنا داخل لحضرتك في ناس عندها مشاكل عايزين يدفعوا تأمينات بتاعت الشركة بتاعتهم مش عارفين».

وتطرق النائب إيهاب منصور إلى شكاوى مواطنين فوجئوا بتسجيلهم على النظام الإلكتروني باعتبارهم متوفين، رغم وجودهم على قيد الحياة، متسائلا عن مصدر البيانات التي أدت إلى تسجيلهم بهذه الصورة.

وقال: «وجبتوا منين البيانات بتاعت الأموات دي، إن إنتوا واحد تقولوا له هو في قصادكم إنه ميت، وروح اثبت لنا».

وكشف منصور عن واقعة لمواطن توجه لصرف معاشه، قبل أن يفاجأ بإبلاغه بأن المعاش متوقف بسبب تسجيله على النظام باعتباره متوفيا.

وأوضح: «كان رايح يصرف المعاش قالوا له أنت ميت، أنت على السيستم. لا لا، واقف، المعاش واقف. خير يا جماعة أنا المعاش واقف، قالوا له عشان إنت بقيت ميت الحمد لله. إيه يا جماعة، إنتوا بتهزروا؟».

وتساءل منصور عن مصدر البيانات التي جرى على أساسها إدراج مواطنين على النظام ضمن المتوفين، قائلا: «يعني بيحسبوا إن اللي رايحين يسحبوا المعاشات بتاعتهم في عدادات الموتى. أجابوها منين بقى؟ ما هو أنا مش هسيب الموضوع، أنا عايز أعرف اللي اتسجل إنه ميت وهو واقف قصادهم ده جابوا البيان ده منين؟ يعني ده لا طلع القماش مثلا، لا شهادة وفاة، ولا يعني إيه جابوها منين دي؟ مين العبقري اللي عمل دي؟».

وعن التواصل مع المسؤولين لحل هذه المشكلات، قال منصور إن هناك مسؤولين محترمين ومتواصلين معه، إلا أن استمرار المشكلات دون حلول لفترات طويلة يؤكد وجود أزمة حقيقية.

وأشار إلى تلقيه شكاوى من مواطنين يعانون من عدم القدرة على توفير احتياجاتهم الأساسية، قائلا: «لما تكلمني واحدة بتعيط، كل المكالمة بتعيط، ما أعرفهاش في المنصورة تقول لي يا ابني أنا مش عارفة أجيب الدواء بقى لي شهور».